मालेगाव शहरातील अंजनकर ज्वेलर्स हे दुकान बंद करून योगेश अंजनकर आणि त्यांचा सहकारी रवी वाळेकर हे दोघे रात्री नऊ वाजेच्या दरम्यान घरी जात होते. योगेश अंजनकर आणि रवी वाळेकर हे घरी बॅग घेऊन जात असताना तीन मोटार सायकलवरून आलेल्या ५ ते ६ दरोडेखोरांनी चाकूने वार केले आणि गोळीबार केला. या हल्यामध्ये योगेश अंजनकर याचा सहकारी रवी वाळेकर याने दरोडेखोरांचा प्रतीकार केल्याने त्याचेवर चाकूने वार करून बंदुकीची गोळी झाडली त्यामध्ये तो गंभीर जखमी झाला. तर सराफा व्यावसायिक योगेश अंजनकर हा सुद्धा गंभीर जखमी झाला आहे. सदर चित्तथरारक घटना शहरातील देशपांडे पॉट जवळील भरवस्तीत घडली.
गंभीर जखमी झालेल्या रवी वाळेकर याचा वाशिम येथे उपचारासाठी नेत असतांना रस्त्यातच मृत्यू झाला. तर योगेश अंजनकर यांच्यावर सामान्य रुग्णालयात उपचार सुरू आहेत. या घटनेत अज्ञात चोरट्यांची मोटर सायकल घटनास्थळी आढळून आली. घटनास्थळी सापडलेली मोटार सायकल चोरीची असल्याची समजते. दरोडेखोरांनी लुटलेल्या बॅगमध्ये दोनशे ग्रॅम सोने व काही रक्कम आणि खाते वही असल्याची माहीती आहे. घटनास्थळी जिल्हा पोलीस अधीक्षक बच्चन सिंह व इतर वरिष्ठ पोलीस अधिकारी दाखल आहेत. मालेगाव पोलीस पुढील तपास करीत आहेत. या घटनेमुळे परिसरात भीती पसरली असून नागरिकांची सुरक्षा ही धोक्यात होत आली असल्याचे दिसून येते.
0 Comments