वारीतील सेवाभावाचा दीपस्तंभ : ७२ पालख्यांना अन्नदान करणारे दानशूर दिनकरराव वाटाणे

वाशिमच्या वाटाणे परिवाराची अनेक वर्षांपासून अखंड अन्नदान, मुक्काम आणि वारकरी सेवेत अविरत परंपरा

वाशिम सुधाकर चौधरी — पंढरपूरच्या आषाढी वारीसह विविध दिंडी व पालखी सोहळ्यांमधून पायी चालणाऱ्या लाखो वारकऱ्यांच्या सेवेसाठी निःस्वार्थ भावनेने कार्य करणारे वाशिम येथील समाजसेवक, उद्योजक तथा वाटाणे लॉनचे संचालक दिनकरराव वाटाणे हे वारकरी संप्रदायात सेवाभावाचे प्रेरणास्थान ठरत आहेत. गेल्या अनेक वर्षांपासून तब्बल ७२ पालखी सोहळ्यांतील वारकरी भाविकांसाठी अन्नदान, मुक्काम, भोजन, निवास आणि विविध सोयी-सुविधांची व्यवस्था करून वाटाणे परिवाराने समाजसेवेचा आदर्श निर्माण केला आहे.

विठ्ठलभक्तांची सेवा हीच ईश्वरसेवा मानणाऱ्या दिनकरराव वाटाणे यांनी कोणत्याही प्रसिद्धीची अपेक्षा न ठेवता वारकऱ्यांच्या सेवेला आपल्या जीवनाचे ध्येय बनविले आहे. दरवर्षी आषाढी वारीच्या निमित्ताने महाराष्ट्राच्या विविध भागांतून पंढरपूरकडे जाणाऱ्या पालख्यांचे वाशिम येथे भक्तिभावाने स्वागत करण्यात येते. वारकऱ्यांच्या मुक्कामासाठी प्रशस्त व्यवस्था, महाप्रसाद, स्वच्छ पिण्याचे पाणी, भोजन, विश्रांती तसेच आवश्यक सुविधा उपलब्ध करून देण्याची परंपरा वाटाणे परिवाराने अखंड जपली आहे.

यंदाही विश्वरत्न माऊली ह.भ.प. श्री संत वासुदेव महाराज यांच्या पालखी सोहळ्याचे वाटाणे परिवाराने उत्साहात स्वागत केले. पालखी पूजन, आरती, कीर्तन तसेच वारकऱ्यांसाठी भोजन व मुक्कामाची उत्तम व्यवस्था करून विठ्ठलभक्तांची मनोभावे सेवा करण्यात आली.

"अन्नदान हे श्रेष्ठ दान" या भारतीय संस्कृतीतील मूल्याचा प्रत्यय वाटाणे परिवाराच्या कार्यातून सातत्याने येत आहे. हजारो वारकऱ्यांच्या चेहऱ्यावर समाधानाचे हास्य फुलविणारी ही सेवा केवळ दानधर्म नसून संत परंपरेप्रती असलेली श्रद्धा आणि समाजाप्रती असलेली बांधिलकी असल्याची भावना वारकरी व्यक्त करीत आहेत.

वारकरी संप्रदायात सेवा, समता आणि प्रेमाचा संदेश कृतीतून जपणाऱ्या दिनकरराव वाटाणे यांच्या या उपक्रमाचे वारकरी, संतप्रेमी आणि समाजातील विविध स्तरांतून कौतुक होत आहे. वाशिमची सेवाभावी परंपरा अधिक समृद्ध करणारे त्यांचे कार्य अनेकांसाठी प्रेरणादायी ठरत असून, वारकरी चळवळीतील निःस्वार्थ सेवक म्हणून त्यांचा गौरव केला जात आहे.

विठ्ठलभक्तांची सेवा म्हणजेच विठ्ठलाची सेवा, या भावनेतून सुरू असलेली वाटाणे परिवाराची अन्नदानाची अखंड परंपरा आगामी काळातही अशीच अविरत सुरू राहो, अशी अपेक्षा वारकरी भाविकांनी व्यक्त केली आहे.