मंगरूळपीर तालुका, वाशिम जिल्हा – महाराष्ट्राच्या भूमीत हजारो मंदिरे असली, तरी काही मंदिरांना स्वतःचा एक दिव्य, अद्वितीय प्रकाश लाभलेला असतो. डोंगर खेळा येथील मा भवानीचे जागृत मंदिर हे असेच एक ठिकाण आहे, जेथे श्रद्धा ही केवळ भावना नसून, ती भक्तांच्या नसानसांत वाहणारा जीवंत अनुभव आहे.
शिवरायांचा इतिहास, भवानीमातेसमोरचा नतमस्तक मुक्काम
डोंगर खेळ्याच्या पावन भूमीला आणखी तेज देणारा प्रसंग म्हणजे – छत्रपती शिवाजी महाराजांनी येथे केलेला एक दिवसाचा ऐतिहासिक मुक्काम! भवानीमातेला नतमस्तक होऊन त्यांनी येथे आशीर्वाद घेतल्याचे सांगितले जाते. डोंगर खेळा ते माहूरगड पर्यंतचा भुयार मार्ग आजही लोकांच्या श्रद्धेचा केंद्रबिंदू आहे. हा मार्ग केवळ भूमीतून जाणारा नसून, तो इतिहासाच्या गाभाऱ्यातून श्रद्धेच्या दिशेने जाणारा आहे.
जागृत देवस्थान – जिथे इच्छा अपूरी राहत नाही
डोंगर खेळ्याची भवानीमाता "जागृत" म्हणून ओळखली जाते. इथं आलेल्या भाविकांचे अनेक चमत्कारिक अनुभव आहेत – कोणाच्या आजाराला आराम मिळतो, कोणाला संतानप्राप्ती होते, कोणाचं लग्न जुळतं, कोणाच्या घरात सुख-शांती प्रस्थापित होते. म्हणूनच दरवर्षी हजारो भाविक इथं येतात – निव्वळ श्रद्धेच्या ओढीने!
दहा दिवसांची यात्रा – भक्तीचा महासागर
नवरात्रोत्सवाच्या दहा दिवसांत डोंगर खेळा संपूर्णत: भक्तिरसात न्हालेला असतो. मंदिर परिसर फुलांनी सजलेला, ढोल-ताशांचा गजर, नित्य भजन-कीर्तन, महाप्रसाद, व्रत, पालखी सोहळे, आणि भाविकांच्या "जय भवानी! जय शिवाजी!" च्या गर्जना – या सर्वात संपूर्ण तीर्थक्षेत्र भक्तीने न्हालेलं असतं.
या संपूर्ण उत्सवाचं सुयोग्य नियोजन श्रीरंग पाटील गिंभा यांच्या नेतृत्वाखाली होतं. गावकरीही आपली सेवा आणि भक्ती घेऊन या कार्यक्रमात तन, मन, धन अर्पण करत असतात. ही यात्रा म्हणजे गावाचा आत्मा आणि गावकऱ्यांची एकात्मता प्रकट करणारा पर्वणीचा क्षण असतो.
मंदिर नव्हे, तर भक्तीचं धाम!
डोंगर खेळा हे केवळ मंदिर नाही, हे भक्ती, इतिहास, श्रद्धा आणि समर्पणाचं एक जिवंत प्रतीक आहे. येथे एकदा दर्शन घेतल्यावर प्रत्येकाचं मन, शरीर आणि आत्मा शुद्ध होतो, असं भाविक अनुभतीने सांगतात.
0 Comments