स्मार्ट मीटर विरोधात जनतेचा एल्गार; जुन्या मीटरसाठी सामूहिक निवेदन

आसेगाव | प्रतिनिधी

मंगरुळपीर विभागातील आसेगाव आणि परिसरातील नागरिकांनी स्मार्ट मीटरमुळे वाढलेल्या विजेच्या बिलांविरोधात आवाज उठवत, जुन्या पद्धतीचे मीटर पुन्हा बसविण्याची मागणी केली आहे. महाराष्ट्र वीज ग्राहक संघटना, ग्रामपंचायत पदाधिकारी आणि शेकडो वीज ग्राहकांनी एकत्र येत कार्यकारी उपअभियंता, मंगरुळपीर यांना सामूहिक निवेदन दिलं.

स्मार्ट मीटरमुळे वाढलेले त्रास :

निवेदनात नमूद केल्याप्रमाणे, स्मार्ट मीटर बसवल्यानंतर वीज बिलात अवास्तव आणि प्रचंड वाढ झाली आहे. अनेक ग्राहकांचा वापर पूर्वीप्रमाणेच असतानाही हजारोंच्या घरात बिल आकारले जात आहे. यामुळे गोरगरीब व सर्वसामान्य जनतेसमोर "पोट भरावे की वीज बिल भरावे?" असा गंभीर प्रश्न निर्माण झाला आहे.

जनतेचा इशारा :

निवेदनाद्वारे नागरिकांनी स्पष्टपणे इशारा दिला आहे की, २ जानेवारी २०२५ रोजी जर स्मार्ट मीटर काढून जुन्या मीटर बसवले गेले नाहीत, तर सर्व वीज ग्राहक स्वतःहून स्मार्ट मीटर काढून कार्यालयात जमा करतील. यानंतर उद्भवणाऱ्या कोणत्याही परिणामांसाठी वीज वितरण कंपनी जबाबदार राहील, असा ठाम इशारा देण्यात आला आहे.

निवेदक व प्रमुख उपस्थिती :

• रामेश्वर गोवर्धन ठाकरे – उपाध्यक्ष, महाराष्ट्र वीज ग्राहक संघटना (वाशिम जिल्हा)
• अकबर खान अफजल खान – सरपंच, आसेगाव
• जावेद अश्फाक शेख – उपसरपंच, आसेगाव
• तसेच परिसरातील शेकडो वीज ग्राहकांनी निवेदनावर सह्या करून पाठिंबा दर्शविला.

प्रशासनाकडे ठोस कारवाईची मागणी

या निवेदनाची प्रत कार्यकारी अभियंता, वीज वितरण कंपनी वाशिम यांनाही देण्यात आली आहे. जनतेत प्रचंड असंतोष असून, शासनाने तातडीने लक्ष देऊन न्याय द्यावा, अशी मागणी जोर धरत आहे.