भुसावळ (प्रतिनिधी):
येथील श्रीमती पी. के. कोटेचा महिला महाविद्यालयाचे प्राचार्य, प्रख्यात समाजसेवक, गोसेवक व जैन समाजातील सक्रिय कार्यकर्ते प्रा. डॉ. डी. एम. ललवाणी यांना ‘द युवा ग्रामीण पत्रकार संघ’ यांच्या वतीने राज्यस्तरीय मानाचा ‘महाराष्ट्र समाजभूषण’ पुरस्कार जाहीर करण्यात आला आहे. त्यांच्या या उल्लेखनीय कार्याची दखल घेत त्यांना हा सन्मान प्रदान केला जाणार आहे.
प्रा. ललवाणी यांनी दीर्घकाळ शिक्षण क्षेत्रासोबतच समाजकार्यातही मोलाचे योगदान दिले आहे. विद्यार्थ्यांचे गुणगौरव सोहळे, सामाजिक ऐक्य वाढविण्यासाठी राबविलेले उपक्रम, तसेच विविध जनजागृती मोहिमा यांच्या माध्यमातून त्यांनी समाजाला सकारात्मक दिशा देण्याचे कार्य केले आहे. निवृत्तीनंतरही त्यांनी निसर्ग संवर्धन, जीवदया, गोसेवा आणि शेतकरी हितासाठी कार्य करत समाजसेवेची परंपरा अखंड ठेवली आहे.
त्यांच्या सातत्यपूर्ण, निःस्वार्थ आणि समाजाभिमुख कार्याची दखल घेत हा प्रतिष्ठेचा पुरस्कार जाहीर करण्यात आला असून, हा सन्मान पंढरपूर येथील पवित्र नगरीत, विठ्ठल मंदिर परिसरात प्रदान करण्यात येणार आहे. या आध्यात्मिक वातावरणात होणारा हा गौरव सोहळा त्यांच्या आयुष्यातील एक अविस्मरणीय क्षण ठरणार आहे.
यापूर्वीही राष्ट्रीय व आंतरराष्ट्रीय स्तरावरील विविध संस्थांनी त्यांच्या कार्याची दखल घेत त्यांना अनेक पुरस्कारांनी सन्मानित केले आहे.
प्रा. ललवाणी यांच्या या यशाबद्दल सर्व स्तरांतून त्यांचे अभिनंदन करण्यात येत असून, मित्रपरिवार, नातेवाईक, समाजबांधव तसेच विविध संघटनांकडून शुभेच्छांचा वर्षाव होत आहे. त्यांच्या कार्यातून प्रेरणा घेऊन तरुण पिढीनेही समाजसेवेत पुढे यावे, अशी अपेक्षा यावेळी व्यक्त करण्यात आली.
0 Comments