“अवकाळी पावसाचा तांडव : मंगरूळपीरमध्ये शेतकऱ्यांचा घास हिरावला, पिकांची अक्षरशः राखरांगोळी!”

मंगरूळपीर : तालुक्यासह शहरासह परिसरात अचानक झालेल्या अवकाळी पावसामुळे शेतकऱ्यांचे मोठ्या प्रमाणात नुकसान झाले आहे. आधीच काढणीच्या उंबरठ्यावर आलेल्या गव्हाच्या पिकाला या पावसाने जोरदार फटका बसला असून, शेतकऱ्यांच्या तोंडाशी आलेला घास हिरावला गेला आहे.

गेल्या काही दिवसांपासून वातावरणात बदल होत असताना अचानक आलेल्या पावसाने शेतकऱ्यांच्या आशांवर पाणी फेरले. शेतात कापणीसाठी तयार असलेला गहू भिजल्याने त्याची गुणवत्ता घसरण्याची भीती व्यक्त केली जात आहे. यामुळे बाजारात योग्य दर मिळण्याची शक्यता कमी झाली आहे.

त्याचबरोबर कांदा पिकालाही मोठा फटका बसला आहे. कांदा भिजल्यामुळे त्याच्या साठवणुकीवर परिणाम होणार असून, शेतकऱ्यांना आर्थिक तोटा सहन करावा लागणार आहे. आधीच उत्पादन खर्च वाढलेला असताना या नैसर्गिक संकटामुळे शेतकरी अधिकच अडचणीत सापडले आहेत.

स्थानिक प्रशासनाने तातडीने पंचनामे करून नुकसानग्रस्त शेतकऱ्यांना मदत जाहीर करावी, अशी मागणी जोर धरत आहे. शेतकरी वर्गाने शासनाकडे आर्थिक मदतीची अपेक्षा व्यक्त केली असून, या संकटातून बाहेर काढण्यासाठी त्वरित उपाययोजना करण्याची गरज व्यक्त होत आहे.

अवकाळी पावसाच्या या तडाख्याने मंगरूळपीर परिसरातील शेती अर्थकारण डळमळीत झाले असून, येणाऱ्या काळात याचे गंभीर परिणाम दिसून येण्याची शक्यता नाकारता येत नाही.