कामगार नेते केशव घोळवे यांना विधान परिषद उमेदवारीची मागणी जोरात

“तळागाळातून विधान परिषदेकडे – कामगारांचा आवाज बुलंद करण्यासाठी केशव घोळवे यांना संधी द्या”

प्रतिनिधी : श्रावणी कामत

पिंपरी-चिंचवड : औद्योगिक क्षेत्रातून घडलेले आणि कामगारांच्या हक्कांसाठी सातत्याने लढणारे ज्येष्ठ कामगार नेते केशव घोळवे यांना येणाऱ्या विधान परिषद निवडणुकीत भारतीय जनता पक्षाने उमेदवारी द्यावी, अशी मागणी कामगार वर्गातून जोर धरत आहे. तळागाळातील अनुभव, संघटन कौशल्य आणि सामाजिक बांधिलकी यांचा संगम असलेले नेतृत्व म्हणून घोळवे यांच्याकडे पाहिले जात आहे.

अत्यंत प्रतिकूल परिस्थितीतून पुढे आलेल्या घोळवे यांनी उसतोड मजूर कुटुंबातून आपल्या जीवनप्रवासाची सुरुवात केली. शिक्षणासाठी विविध कष्टाची कामे करत त्यांनी आयटीआय पूर्ण केले आणि वेल्डर म्हणून औद्योगिक क्षेत्रात प्रवेश केला. १९९८ मध्ये थरमॅक्समध्ये कायम नोकरी मिळाल्यानंतर त्यांनी कामगार प्रतिनिधी म्हणून आपली वेगळी ओळख निर्माण केली.

थरमॅक्स कामगार संघटनेच्या माध्यमातून त्यांनी औद्योगिक क्षेत्रात अनेक सकारात्मक बदल घडवून आणले. ‘कायझेन’, ‘5S’, ‘TPM’, ‘TQM’ यांसारख्या व्यवस्थापन तत्त्वांचा अवलंब करून उत्पादनक्षमता वाढवणे, अपव्यय कमी करणे आणि कामगार-व्यवस्थापन संबंध सुधारण्यावर त्यांनी भर दिला. त्यांच्या नेतृत्वाखाली संघटनेला ISO 9001 प्रमाणपत्र मिळाले, तसेच कामगार समाधान सर्वेक्षणासारखे उपक्रम राबवण्यात आले.

२००४ मध्ये ‘श्रमिक एकता महासंघ’ची स्थापना करून त्यांनी १५० हून अधिक संघटनांना एकत्र आणले. औद्योगिक क्षेत्रातील त्यांच्या कार्यामुळे त्यांना इटली, जर्मनी, फ्रान्स आणि स्पेन येथे अभ्यास दौरे करण्याची संधी मिळाली, तसेच आंतरराष्ट्रीय स्तरावर व्याख्यानांसाठी निमंत्रणेही मिळाली.

दरम्यान, काही प्रतिकूल घटनांमुळे थरमॅक्समधील नोकरी गमवावी लागली. मात्र या संकटालाही संधीमध्ये रूपांतरित करत त्यांनी पिंपरी-चिंचवड महानगरपालिकेच्या निवडणुकीत भाग घेतला आणि नगरसेवक म्हणून निवडून आले. आर्थिक पाठबळ नसतानाही कामगारांच्या विश्वासावर मिळवलेला हा विजय ‘श्रमशक्तीचा विजय’ म्हणून ओळखला गेला.

नगरसेवक आणि उपमहापौर म्हणून काम करताना त्यांनी शहराच्या विकासासाठी विविध प्रकल्प राबवले. दिव्यांगांसाठी सुविधा, किमान वेतन अंमलबजावणी, आशा सेविकांचे मानधन वाढ, तसेच शिक्षण सेवकांना लाभ मिळवून देणे अशा मुद्द्यांवर त्यांनी ठोस भूमिका घेतली.

भारतीय जनता पक्षात सक्रिय झाल्यानंतरही त्यांनी कामगार आणि असंघटित घटकांच्या प्रश्नांसाठी सातत्याने आवाज उठवला आहे. ग्राहक किंमत निर्देशांक समिती आणि किमान वेतन समितीवर काम करताना त्यांनी कामगारहिताचे निर्णय पुढे नेण्यास हातभार लावला.

कामगार वर्गाचे म्हणणे आहे की, “तळागाळातून आलेले आणि कामगारांच्या प्रश्नांची सखोल जाण असलेले नेतृत्व विधान परिषदेत गेले, तर कामगारांचे प्रश्न अधिक प्रभावीपणे मांडले जातील.” त्यामुळे येणाऱ्या निवडणुकीत भारतीय जनता पक्षाने केशव घोळवे यांना उमेदवारी द्यावी, अशी मागणी आता अधिक तीव्र होत आहे.

सध्या त्यांच्या नावाची राजकीय वर्तुळात चर्चा सुरू असून, पक्ष नेतृत्व याबाबत काय निर्णय घेते याकडे सर्वांचे लक्ष लागले आहे.