🔴 "स्वराज्य हा माझा जन्मसिद्ध हक्क आहे!" - मंगरूळपीर येथे टिळक जयंतीनिमित्त अभिवादन कार्यक्रम

🖋️ प्रतिनिधी | वाशिम खबर आवाज महाराष्ट्र

मंगरूळपीर –
"स्वराज्य हा माझा जन्मसिद्ध हक्क आहे आणि तो मी मिळवणारच!" – ही जाज्वल्य गर्जना करणाऱ्या लोकमान्य बाळ गंगाधर टिळक यांच्या जयंतीनिमित्त मंगरूळपीर येथील जुनी पंचायत समिती कार्यालयात एकात्मिक बाल विकास प्रकल्पांतर्गत कार्यरत प्रगती महिला समुपदेशन केंद्राच्या वतीने भव्य कार्यक्रम घेण्यात आला.

या कार्यक्रमात लोकमान्य टिळकांच्या प्रतिमेचे पूजन करून, पुष्पहार अर्पण करत त्यांना अभिवादन करण्यात आले. उपस्थित मान्यवरांचे पुष्पगुच्छ देऊन स्वागत करण्यात आले आणि प्रत्येक मान्यवराने आपल्या मनोगतातून लोकमान्यांच्या कार्याची प्रेरणा घेण्याचे आवाहन केले.

कार्यक्रमाच्या अध्यक्षस्थानी राज्यस्तरीय पुण्यश्लोक अहिल्याबाई होळकर पुरस्कार प्राप्त वनमाला ताई पेंढारकर होत्या. त्यांनी आपल्या भाषणात टिळकांच्या विचारांचा वारसा पुढे नेत "स्वराज्य" ही केवळ ऐतिहासिक गोष्ट नसून आजच्या काळात सामाजिक न्याय, महिलांचा सशक्तीकरण, वंचितांसाठीचा आवाज बनून उभं राहणं हेच खरे स्वराज्य आहे, असे ठामपणे सांगितले.

या वेळी प्रमुख अतिथी म्हणून अर्चना फाळे मॅडम, बाल विकास प्रकल्प अधिकारी मोनिका जाधव, सहाय्यक निबंधक रवी दहापुते, एकात्मिक बाल विकास अधिकारी ज्ञानेश्वर राठोड, कनिष्ठ लिपिक कौशल्याबाई बेलखेडे, अंगणवाडी संघटिका सोनल ताई दुबे, सामाजिक कार्यकर्त्या विशाखा देशमुख, तसेच पोलीस स्टेशन मंगरूळपीर येथील दक्षता समिती सदस्य यमुनाताई बेलखेडे व सुरेखा चव्हाण, समुपदेशक मनीषा दाभाडे आणि सोनल पेंढारकर आदी मान्यवरांची उपस्थिती लाभली.

कार्यक्रमाचे उत्कृष्ट सूत्रसंचालन विधी सल्लागार मनीषा दाभाडे यांनी केले, तर आभारप्रदर्शन सोनल पेंढारकर यांनी मानले.
या कार्यक्रमाचे आयोजन शिवरत्न महिला मंडळ तसेच गोरोबा काका संस्था यांच्या संयुक्त विद्यमाने करण्यात आले होते.

🔺हा कार्यक्रम म्हणजे टिळकांच्या विचारांची पुनर्पूर्ती आणि महिला सक्षमीकरणाच्या दिशेने एक सकारात्मक पाऊल होते, अशी भावना उपस्थितांनी व्यक्त केली.
मंगरूळपीर सारख्या ग्रामीण भागात अशा जाणीव जागृती कार्यक्रमांना विशेष महत्त्व असून, हा उपक्रम नक्कीच अनुकरणीय ठरेल!