मंगरूळ नाथ श्री सोमनाथ पंचवटी संस्थानात गावोगावीच्या कावड यात्रेकरूंचा उत्सवमूर्त जल्लोषात सत्कार!

""यात्रेकरू म्हणजे महादेवाचे मान्यवर' - या भावनेने उजळला पंचवटीचा सोहळा" सुनिता ताई ललित पाटील

शिवभक्तांच्या ओंजळभर श्रद्धेला, डोळ्यातल्या भक्तीच्या अश्रूंना आणि पायांतील थकव्यालाही हरवून टाकणाऱ्या उत्साहाला पाहून पंचवटी परिसर सोमवारी सकाळपासून जणू शिवधामच झाला होता. श्री सोमनाथ पंचवटी संस्थानाच्या पवित्र प्रांगणात गावोगावीचे कावड यात्रेकरू येताच – श्रीमती सुनिता ताई ललित  पाटील, त्यांचे चिरंजीव आदित्य पाटील,सौ दिपाली गजानन गिरडेकर, सौ गंगा ताई जामनिक, सौ ज्योतीताई सुरेश पाटील कुमारी प्रांजल ठाकरे , कुमारी प्रांजल जामनिक,तसेच मंदिरावर प्रत्येक वेळी आपला घाम आणि जीव ओतणारे भास्कर भाऊ मुळे व त्यांचे सहकारी मित्र यांनी हसतमुखाने, आदराने आणि प्रेमळपणे स्वागताची पखरण केली.

गुरुद्वज कावड मंडळ, जाणता राजा कावड मंडळ आणि राज राजेश्वर कावड मंडळाच्या मिरवणुका पंचवटीच्या पायऱ्यांवर येताच टाळ-ढोल-झांजांचा नाद, शंखाच्या गजरासह “हर हर महादेव”च्या लाटेत परिसर दणाणून गेला. भगव्या केशरी पताकांच्या फडकण्याने जणू आकाशही शिवभक्तांच्या जयघोषाला दाद देत होते. यात्रेकरूंच्या अंगावर गुलाबपुष्पांचा वर्षाव, ओवाळणीच्या आरत्या आणि भक्तीगीतांनी प्रत्येकाचे स्वागत हे केवळ विधी नव्हे, तर प्रेमाचा साक्षात उत्सव झाला.

ज्यांच्या पायांना शेकडो मैल चालण्याचा थकवा होता, त्या पावलांना या सन्मानाच्या क्षणी नवी उर्जा मिळाली. ज्यांच्या डोळ्यांत शिवधामाच्या दर्शनाची आस होती, त्या डोळ्यांत समाधानाची चमक उमटली. पंचवटीच्या अंगणात उभा असलेला प्रत्येक शिवभक्त, जणू महादेवाच्या दरबारातच उभा असल्याचा अनुभव घेत होता.

ही केवळ स्वागताची परंपरा नाही… ही पंचवटीच्या मातीची संस्कृती आहे – ‘यात्रेकरू म्हणजे महादेवाचे मान्यवर’ अशी मानणारी!

टाळ-ढोल-शंखनादात उमटला भक्तीचा जल्लोष – सोमनाथ पंचवटीत कावड यात्रेकरूंचा सन्मान"