स्वखर्चाने वृत्तपत्र प्रकाशित करून जनतेपासून मंत्रालयापर्यंत लोकप्रश्न मांडणाऱ्या निस्पृह पत्रकाराचा सन्मान; साहित्य, पत्रकारिता, सामाजिक चळवळी आणि लोककलावंतांसाठीच्या संघर्षाची राज्यस्तरावर दखल
कारंजा (लाड) : पत्रकारिता ही केवळ व्यवसाय नसून समाजसेवेचे प्रभावी माध्यम आहे, हे गेल्या चार दशकांपासून आपल्या कार्यातून सिद्ध करणारे कारंजा येथील ज्येष्ठ पत्रकार संजय कडोळे यांच्या प्रदीर्घ, निस्पृह आणि समाजाभिमुख पत्रकारितेची राज्यस्तरावर दखल घेण्यात आली आहे. महाराष्ट्र राज्य पत्रकार संघाच्या वतीने त्यांना 'उत्कृष्ट पत्रकारिता' या प्रतिष्ठेच्या राज्यस्तरीय पुरस्काराने सन्मानित करण्यात आले. त्यांच्या चार दशकांच्या अविरत पत्रकारिता, साहित्यसेवा, सामाजिक बांधिलकी आणि लोकहितासाठी केलेल्या कार्याचा हा गौरव मानला जात आहे.
आजच्या स्पर्धात्मक युगात जाहिरातींच्या माध्यमातून वृत्तपत्र व्यवसाय चालविण्याची परंपरा असताना, संजय कडोळे यांनी मात्र कोणत्याही शासकीय किंवा संस्थात्मक जाहिरातींचा आधार न घेता, स्वतःच्या आर्थिक बळावर वृत्तपत्र प्रकाशित करून ते थेट सर्वसामान्य जनतेपर्यंत, लोकप्रतिनिधींपर्यंत, विधानसभेपर्यंत, राज्य शासन आणि केंद्रीय मंत्रालयांपर्यंत पोहोचविण्याचे कार्य सातत्याने केले. त्यांच्या पत्रकारितेचा केंद्रबिंदू नेहमीच समाजहित, लोकप्रश्न आणि जनसामान्यांचा आवाज हा राहिला. त्यामुळेच त्यांची ओळख निर्भीड, निस्पृह, नि:स्वार्थी आणि सेवाव्रती पत्रकार म्हणून निर्माण झाली आहे.
अकोला येथे पार पडलेल्या महाराष्ट्र राज्य पत्रकार संघाच्या राज्यस्तरीय पत्रकार अधिवेशनात हा पुरस्कार प्रदान करण्यात आला. प्रदेशाध्यक्ष निलेश सोमानी आणि सौ. भारतीदेवी सोमानी यांनी त्यांच्या नावाची निवड केली होती. प्रदेशाध्यक्ष निलेश सोमानी, सरचिटणीस डॉ. विश्वासराव आरोटे आणि प्रदेश उपाध्यक्ष प्रा. महेश पानसे यांच्या हस्ते पुष्पगुच्छ, सन्मानचिन्ह आणि भेटवस्तू देऊन संजय कडोळे यांचा गौरव करण्यात आला. उपस्थित पत्रकारांनी टाळ्यांच्या कडकडाटात त्यांच्या कार्याला मानवंदना दिली.
संजय कडोळे यांनी गेल्या ४० वर्षांत पत्रकारिता आणि साहित्य क्षेत्रात मोलाची भर घातली आहे. हजारो कविता, लेख, वैचारिक लिखाण, सामाजिक प्रश्नांवरील अभ्यासपूर्ण लेख आणि विविध विषयांवरील भाष्य त्यांनी सातत्याने केले आहे. महामानव डॉ. बाबासाहेब आंबेडकर जन्मशताब्दी, पंडित जवाहरलाल नेहरू जन्मशताब्दी स्मरणिका, तसेच दैनिक महासागर, दैनिक नागपूर पत्रिका, दैनिक जनवाद, दैनिक लोकपथ आणि विविध दिवाळी अंकांतून त्यांचे विपुल लेखन प्रसिद्ध झाले आहे. त्यांच्या लेखणीतून सामाजिक परिवर्तन, लोकजागृती आणि प्रबोधनाचा सातत्याने ध्यास दिसून येतो.
पत्रकारितेबरोबरच साहित्य क्षेत्रातही त्यांनी उल्लेखनीय कार्य केले आहे. कारंजा येथे ज्ञानगंगा साहित्य मंडळाची स्थापना करून साहित्यिक चळवळीला नवी दिशा दिली. ज्येष्ठ कवी विठ्ठल वाघ, साहित्यिक बाजीराव पाटील, प्रभाकर जावरकर, बाबा मोहोड, राजिया सुलताना यांच्यासह अनेक मान्यवर साहित्यिकांच्या उपस्थितीत साहित्य संमेलने, काव्यवाचन कार्यक्रम आणि वैचारिक परिसंवाद आयोजित करून ग्रामीण भागात साहित्य संस्कृती रुजविण्याचे मोठे काम त्यांनी केले. नाट्य चळवळीच्या उभारणीतही त्यांचे योगदान महत्त्वपूर्ण राहिले असून अनेक सांस्कृतिक उपक्रमांना त्यांनी दिशा दिली.
पत्रकार म्हणून समाजातील वंचित, उपेक्षित आणि दुर्लक्षित घटकांसाठी संघर्ष करण्याची त्यांची भूमिका कायम राहिली आहे. १७ नोव्हेंबर २०२२ रोजी विदर्भ लोककलावंत संघटनेच्या माध्यमातून हजारो लोककलावंतांना एकत्र आणत त्यांनी आंदोलन उभारले. त्यानंतर २४ जानेवारी २०२६ रोजी वाशिम जिल्हाधिकारी कार्यालयावर ऐतिहासिक आंदोलनाचे नेतृत्व करून लोककलावंतांच्या न्याय्य मागण्यांसाठी आवाज बुलंद केला. या आंदोलनाची राज्य शासनाने गंभीर दखल घेतली आणि तत्कालीन मुख्यमंत्री एकनाथ शिंदे यांनी लोककलावंतांच्या मानधनात वाढ करण्याचा महत्त्वपूर्ण निर्णय घेतला. सामाजिक प्रश्नांवर सातत्याने लढा देणाऱ्या पत्रकाराच्या भूमिकेचा हा मोठा परिणाम मानला जातो.
पुरस्कार स्वीकारल्यानंतर संजय कडोळे भावूक झाले. "ज्येष्ठ पत्रकारांचा सन्मान करणारी ही राज्यातील मोजक्या संघटनांपैकी एक संघटना आहे. हा पुरस्कार माझ्यासाठी प्रेरणादायी असून समाजासाठी अधिक जबाबदारीने काम करण्याची ऊर्जा देणारा आहे. प्रदेशाध्यक्ष निलेश सोमानी, सौ. भारतीदेवी सोमानी, डॉ. विश्वासराव आरोटे, प्रा. महेश पानसे, सुनील फुलारी, किरण क्षार आणि पत्रकार बांधवांचे प्रेम व सहकार्य मला सदैव लाभले. आयुष्यभर माझी लेखणी समाजहितासाठीच चालत राहील," अशी भावना त्यांनी व्यक्त केली.
या सोहळ्याला प्रदेश संपर्कप्रमुख वैभव स्वामी, विदर्भ अध्यक्ष नयन मोंढे, अनुप भार्गव, विभागीय अध्यक्ष सुनील फुलारी, अकोला जिल्हाध्यक्ष गणेश सुरजुसे, वाशिम जिल्हाध्यक्ष किरण क्षार, ग्रामीण पत्रकार संघाचे प्रदेशाध्यक्ष गजानन वाघमारे, गजानन काटे, विलास राऊत, अंकुश कडू, प्रदीप वानखडे, मोहम्मद मुन्निवाले यांच्यासह राज्यभरातील पत्रकार मोठ्या संख्येने उपस्थित होते.
चार दशकांहून अधिक काळ निष्ठेने, कोणत्याही मोहाला बळी न पडता, समाजहिताला केंद्रस्थानी ठेवून केलेल्या पत्रकारितेचा हा सन्मान केवळ संजय कडोळे यांचाच नसून मूल्याधिष्ठित, लोकाभिमुख आणि सेवाव्रती पत्रकारितेचा गौरव असल्याची भावना उपस्थित पत्रकारांनी व्यक्त केली. त्यांच्या या यशामुळे कारंजा शहरासह वाशिम जिल्ह्याच्या शिरपेचात आणखी एक मानाचा तुरा रोवला गेला आहे.
0 Comments