मानोऱ्यात महिला शक्तीचा संघटनात्मक हुंकार!

भाजप महिला मोर्चाच्या बांधणी बैठकीला उत्स्फूर्त प्रतिसाद; जिल्हाध्यक्षा सौ. कविता परमेश्वर खराट यांच्या नेतृत्वात संघटन विस्ताराचा निर्धार

मानोरा | सुधाकर चौधरी

भारतीय जनता पार्टी महिला मोर्चाच्या वाशिम जिल्हाध्यक्षा सौ. कविता परमेश्वर खराट यांच्या नेतृत्वाखाली महिला मोर्चाच्या संघटनात्मक बळकटीकरणाला वेग आला असून, त्याचाच एक भाग म्हणून मानोरा येथे महिला मोर्चाची संघटनात्मक बांधणी व कार्यकारिणी बैठक उत्साहपूर्ण वातावरणात संपन्न झाली. या बैठकीला महिला पदाधिकारी व कार्यकर्त्यांचा उत्स्फूर्त प्रतिसाद मिळाला.

वाशिम जिल्ह्यातील महिला संघटन अधिक मजबूत करण्याच्या उद्देशाने कारंजा, मानोरा व मंगरूळपीर तालुक्यांचा संघटनात्मक प्रवास दौरा आयोजित करण्यात आला. या दौऱ्यात मानोरा येथील शासकीय विश्रामगृहात महिला मोर्चाच्या आगामी वाटचालीसंदर्भात महत्त्वपूर्ण चर्चा करण्यात आली.

जिल्हाध्यक्षा कविता खराट यांच्या नेतृत्वाला महिला शक्तीची साथ

महिला मोर्चा मानोरा मंडळाच्या अध्यक्षा सौ. सीमाताई राठोड यांच्या आयोजनातून झालेल्या या बैठकीत आगामी पक्षीय कार्यक्रम, संघटन विस्तार, कार्यकारिणीची बांधणी आणि महिलांचा पक्ष संघटनेतील सक्रिय सहभाग यावर सविस्तर चर्चा झाली.

यावेळी भाजप महिला मोर्चा वाशिम जिल्हाध्यक्षा सौ. कविता परमेश्वर खराट यांनी उपस्थित महिला पदाधिकारी व कार्यकर्त्यांना मार्गदर्शन करताना संघटना मजबूत करण्यासाठी प्रत्येक महिला कार्यकर्त्याने सक्रियपणे पुढे येण्याची गरज व्यक्त केली. महिला शक्तीला संघटनेची ताकद मिळाल्यास तळागाळातील जनसंपर्क अधिक व्यापक होऊ शकतो, या दृष्टिकोनातून विविध उपक्रमांवर भर देण्यात आला.

प्रदेश सहप्रभारी शुभदाताई नायक यांचे मार्गदर्शन

यावेळी प्रदेश सहप्रभारी सौ. शुभदाताई नायक यांनीही उपस्थितांना मार्गदर्शन केले. पक्षाची विचारधारा, संघटनात्मक शिस्त आणि महिला कार्यकर्त्यांची जबाबदारी याबाबत त्यांनी मार्गदर्शन केले.

बैठकीस जिल्हा सरचिटणीस सौ. अन्नपूर्णाताई पांडे यांची प्रमुख उपस्थिती होती. मानोरा मंडळाची कार्यकारिणी अधिक सक्षम व सक्रिय करण्यासाठी उपस्थित पदाधिकारी आणि कार्यकर्त्यांशी संवाद साधण्यात आला.

प्रत्येक घरापर्यंत पोहोचण्याचा निर्धार

महिला सक्षमीकरणासोबतच पक्षाची ध्येयधोरणे, शासनाच्या विविध योजना आणि विकासकामांची माहिती तळागाळातील प्रत्येक घरापर्यंत पोहोचविण्याचा संकल्प यावेळी उपस्थित महिला पदाधिकारी व कार्यकर्त्यांनी केला.

संघटनात्मक प्रवासाच्या माध्यमातून जिल्ह्यातील महिला मोर्चाला अधिक व्यापक स्वरूप देण्याच्या दिशेने प्रयत्न सुरू असून, मानोरा बैठकीतून महिला संघटनाच्या विस्ताराला नवी ऊर्जा मिळाल्याचे चित्र पाहायला मिळाले.

उपस्थित महिला पदाधिकारी व कार्यकर्त्यांच्या उत्स्फूर्त सहभागामुळे बैठकीला विशेष ऊर्जा प्राप्त झाली.