🌍 नगर परिषद शाळेपासून थेट स्वित्झर्लंडच्या राष्ट्रीय विजेतेपदापर्यंत!

मंगरूळपीरच्या सिमरन आसावाची आंतरराष्ट्रीय भरारी; FameLab स्पर्धेत स्वित्झर्लंडची विजेती, आता पोलंडमध्ये आंतरराष्ट्रीय मंचावर झळकणार

मंगरूळपीर : संजय राठी

जिथे स्वप्नांना शिक्षणाची पंखे मिळतात, तिथून आकाश कितीही दूर असले तरी भरारी घेता येते! मंगरूळपीरच्या नगर परिषद शाळेपासून सुरू झालेल्या शिक्षणाच्या प्रवासाने आज स्वित्झर्लंडपर्यंत मजल मारली असून, मंगरूळपीरच्या सिमरन आसावा हिने विज्ञान संवादाच्या क्षेत्रात उल्लेखनीय कामगिरी केली आहे. प्रतिष्ठित FameLab स्पर्धेत सिमरनने स्वित्झर्लंडचे राष्ट्रीय विजेतेपद पटकावले असून, आता डिसेंबरमध्ये पोलंड येथे होणाऱ्या आंतरराष्ट्रीय स्पर्धेत ती स्वित्झर्लंडचे प्रतिनिधित्व करणार आहे.

ही कामगिरी केवळ सिमरन आसावा हिचे वैयक्तिक यश नसून, मंगरूळपीरच्या शैक्षणिक वाटचालीसाठी आणि तिच्या कुटुंबीयांसह संपूर्ण तालुक्यासाठी अभिमानाचा क्षण ठरला आहे.

नगर परिषद शाळेच्या वर्गखोलीतून सुरू झाली वाटचाल

डॉ. नवलकिशोर आसावा यांची कन्या सिमरन हिचे प्राथमिक शिक्षण मंगरूळपीर नगर परिषद शाळा क्रमांक २ येथे इयत्ता पहिली ते चौथीपर्यंत झाले. त्यानंतर कारंजा लाड येथील जे. सी. हायस्कूल अँड ज्युनिअर कॉलेजमध्ये पाचवी ते दहावीचे शिक्षण पूर्ण केले.

नागपूर येथे अकरावी-बारावीचे शिक्षण घेतल्यानंतर तिने एनआयटी वरंगल येथून बी.टेक. पदवी संपादन केली. त्यानंतर जर्मनीमध्ये एम.एस.चे शिक्षण पूर्ण केले. पुढे स्वित्झर्लंडमधील झ्युरिक येथे कॅन्सर संशोधन विषयात पीएच.डी.चा प्रवास सुरू केला.

सध्या सिमरन स्वित्झर्लंडमध्ये पीएच.डी. संशोधक म्हणून कार्यरत असून, प्रोफेसर निकोला असेटो यांच्या संशोधन गटाशी संबंधित आहे.

तीन मिनिटांत विज्ञान सर्वसामान्यांपर्यंत!

विज्ञानातील गुंतागुंतीच्या संकल्पना सामान्य नागरिकांना सोप्या, प्रभावी आणि रंजक पद्धतीने समजावून सांगण्याची क्षमता तपासणारी FameLab ही आंतरराष्ट्रीय स्तरावरील विज्ञान संवाद स्पर्धा आहे.

२००५ मध्ये ब्रिटनमधील चेल्टनहॅम सायन्स फेस्टिव्हलमध्ये या स्पर्धेची सुरुवात झाली. स्पर्धकांना अवघ्या तीन मिनिटांत विज्ञानातील एखादी संकल्पना प्रभावीपणे मांडावी लागते. Content, Clarity आणि Charisma या प्रमुख निकषांवर स्पर्धकांचे मूल्यमापन केले जाते.

ज्युरीसह प्रेक्षकांचीही मने जिंकली

स्वित्झर्लंडचे प्रतिनिधित्व करण्यासाठी आयोजित राष्ट्रीय पातळीवरील स्पर्धेत सिमरनने दमदार कामगिरी केली. झ्युरिख येथील प्रादेशिक फेरीत तिने Audience Vote मिळवत प्रेक्षकांची पसंती मिळवली.

यानंतर राष्ट्रीय स्तरावरील स्पर्धेत तिने Jury Vote आणि Audience Vote या दोन्ही प्रकारांत विजय मिळविला. या दुहेरी यशामुळे सिमरनची स्वित्झर्लंडची राष्ट्रीय विजेती म्हणून निवड झाली.

आता तिच्या यशाची पुढची पायरी म्हणजे पोलंडमधील FameLab International स्पर्धा. डिसेंबरमध्ये होणाऱ्या या आंतरराष्ट्रीय व्यासपीठावर ती स्वित्झर्लंडचे प्रतिनिधित्व करणार आहे.

मंगरूळपीरच्या विद्यार्थ्यांसाठी प्रेरणादायी आदर्श

एका छोट्या शहरातील नगर परिषद शाळेतून शिक्षणाला सुरुवात करून उच्च शिक्षण, संशोधन आणि त्यानंतर आंतरराष्ट्रीय विज्ञान संवादाच्या मंचापर्यंत पोहोचलेली सिमरनची वाटचाल अनेक विद्यार्थ्यांसाठी प्रेरणादायी आहे.

संधी मिळाली तर छोट्या शहरातील विद्यार्थीही जगाच्या व्यासपीठावर आपली ओळख निर्माण करू शकतो, याचे उदाहरण सिमरनने आपल्या प्रवासातून दाखवून दिले आहे.

तिच्या या यशामुळे मंगरूळपीर परिसरात आनंदाचे वातावरण असून, विविध स्तरांतून तिचे अभिनंदन केले जात आहे. आता पोलंड येथे होणाऱ्या आंतरराष्ट्रीय स्पर्धेत सिमरनच्या कामगिरीकडे मंगरूळपीरकरांसह संपूर्ण वाशिम जिल्ह्याचे लक्ष लागले आहे.

 एका छोट्या शहरातून मोठ्या जगापर्यंत…!

नगर परिषद शाळेपासून स्वित्झर्लंडच्या राष्ट्रीय विजेतेपदापर्यंतचा सिमरन आसावाचा प्रवास; आता पोलंडमध्ये आंतरराष्ट्रीय विज्ञान मंचावर मंगरूळपीरच्या कन्येची दमदार उपस्थिती!

मंगरूळपीरच्या शिरपेचात मानाचा तुरा; सिमरनच्या यशाने नव्या पिढीला मिळाली स्वप्नांना पंख देण्याची प्रेरणा.

✍️ वृत्तांकन : संजय राठी वाशिम खबर आवाज महाराष्ट्र