मंगरूळपीर पोलीस स्टेशन येथे पोलीस मित्र संघटनेच्या महिला पदाधिकाऱ्यांचा गौरव

पोलीस–नागरिक समन्वयाचा आदर्श;
मंगरूळपीर पोलीस स्टेशन येथे पोलीस मित्र संघटनेच्या महिला पदाधिकाऱ्यांचा गौरव

वाशिम | मंगरूळपीर (सुधाकर चौधरी)

पोलीस–नागरिक समन्वय अधिक दृढ करण्याबरोबरच सामाजिक सलोखा, जनजागृती आणि महिला सक्षमीकरणाच्या दिशेने उल्लेखनीय कार्य करणाऱ्या पोलीस मित्र संघटना, नवी दिल्ली (भारत) यांच्या वतीने मंगरूळपीर पोलीस स्टेशन येथे महिला पदाधिकारी व सदस्यांचा ट्रॉफी, आयडेंटिटी कार्ड, गणवेश व सन्मानपत्र देऊन गौरव करण्यात आला.

हा सन्मान सोहळा मंगरूळपीर पोलीस स्टेशनचे वरिष्ठ पोलीस अधिकारी तथा ठाणेदार मा. किशोर शेळके यांच्या हस्ते पार पडला. यावेळी बोलताना त्यांनी, समाजात सुरक्षितता, विश्वास व सहकार्याचे वातावरण निर्माण करण्यासाठी पोलीस मित्र संघटनेचे कार्य महत्त्वपूर्ण असून, अशा सामाजिक उपक्रमांमुळे पोलीस व नागरिक यांच्यातील नाते अधिक दृढ होते, असे प्रतिपादन केले.

कार्यक्रमास ज्योतीताई मनोजराव ठाकरे (निरीक्षक, वाशिम जिल्हा) व जयमाला जाधव (उपनिरीक्षक, वाशिम जिल्हा) यांची प्रमुख उपस्थिती होती. त्यांच्या उपस्थितीमुळे सोहळ्याचे महत्त्व अधिकच अधोरेखित झाले.

यावेळी सामाजिक क्षेत्रात भरीव योगदान देणाऱ्या पोलीस मित्र संघटनेच्या पुढील महिला पदाधिकारी व सदस्यांचा सन्मान करण्यात आला—
कु. वैष्णवी जाधव (अध्यक्ष, मंगरूळपीर तालुका महिला आघाडी),
श्री. सुभाष जाधव (उपाध्यक्ष, मंगरूळपीर),
ज्योतीताई मनोजराव ठाकरे (निरीक्षक, वाशिम जिल्हा),
जयमाला जाधव (उपनिरीक्षक, वाशिम जिल्हा),
कु. स्नेहा कांबळे (युवा उपसचिव),
कु. वैष्णवी सावळे (सदस्य),
कु. प्रियंका ठोंबरे (सदस्य)
आणि कु. ममता निलकंठ (सदस्य).

पोलीस मित्र संघटना ही केवळ सामाजिक संघटना नसून, लोकशाही मूल्ये, मानवाधिकार, महिला नेतृत्व आणि सुरक्षित समाजनिर्मिती या संकल्पनांना प्रत्यक्ष कृतीतून साकार करणारी चळवळ असल्याचे मत यावेळी मान्यवरांनी व्यक्त केले. महिला आघाडीच्या माध्यमातून मंगरूळपीर तालुक्यात राबविले जाणारे उपक्रम हे आंतरराष्ट्रीय स्तरावरही अभ्यासण्याजोगे आदर्श मॉडेल ठरत असल्याचेही त्यांनी नमूद केले.

हा सन्मान सोहळा म्हणजे “लोकशाहीत पोलीस आणि नागरिक हे परस्परांचे भागीदार आहेत” या संकल्पनेला बळ देणारा ठरला असून, समाजात सकारात्मक संदेश देणारा एक महत्त्वाचा टप्पा ठरल्याची प्रतिक्रिया उपस्थितांनी व्यक्त केली.