मूकबधिर आश्रमशाळा व वृद्धाश्रमात राधेश्यामजी चांडक यांचा अमृत महोत्सवी वाढदिवस उत्साहात

समाजसेवा आणि सहकार क्षेत्रातील योगदानाचा गौरव; संजय राठी यांनी व्यक्त केला कृतज्ञतेचा भाव

मंगरूळपीर : वरूड रोड परिसरातील मूकबधिर आश्रमशाळा तथा वृद्धाश्रम येथे बुलढाणा अर्बन को-ऑप क्रेडिट सोसायटीचे संस्थापक अध्यक्ष आदरणीय राधेश्यामजी चांडक (भाईजी) यांचा ७५ वा अमृत महोत्सवी वाढदिवस उत्साहपूर्ण व भावनिक वातावरणात साजरा करण्यात आला. यावेळी उपस्थितांनी भाईजींच्या दीर्घायुष्यासाठी शुभेच्छा देत त्यांच्या सामाजिक व सहकार क्षेत्रातील योगदानाचा गौरव केला.

कार्यक्रमाच्या अध्यक्षस्थानी डॉ. जयंत पिंपरकर होते. प्रमुख उपस्थितींमध्ये बुलढाणा अर्बनचे विभागीय व्यवस्थापक अमोलजी शिंदे, माहेश्वरी संघटनेचे विदर्भ प्रदेश कार्यसमिती सदस्य संजय राठी, किशोर भुतडा, शाखा व्यवस्थापक अनिल राठी तसेच सहशाखा व्यवस्थापक बद्रीनारायण गाडे यांची उपस्थिती होती.

यावेळी भाईजींच्या कार्याचा गौरव करताना संजय राठी यांनी सांगितले की, आजचा दिवस सर्वांसाठी अभिमान आणि भावनेने भरलेला आहे. समाज आणि सहकार क्षेत्रासाठी आयुष्य समर्पित करणाऱ्या व्यक्तिमत्त्वाचा ७५ वा अमृत महोत्सव साजरा करण्याची संधी मिळणे ही आनंदाची बाब आहे.

७२ सदस्यांपासून सुरू झालेला प्रवास वटवृक्षात रूपांतरित

राठी म्हणाले की, १५ ऑगस्ट १९८६ रोजी केवळ ७२ सदस्यांच्या माध्यमातून आणि एका छोट्याशा खोलीतून बुलढाणा अर्बनची सुरुवात झाली. त्या वेळी या छोट्याशा रोपट्याचे भविष्यात विशाल वटवृक्षात रूपांतर होईल, याची कदाचित कल्पनाही अनेकांना नसावी. मात्र भाईजींची दूरदृष्टी, दृढनिश्चय आणि अथक परिश्रम यांच्या बळावर संस्थेने मोठी वाटचाल केली.

प्रामाणिकपणा, विश्वास, पारदर्शकता आणि सातत्यपूर्ण परिश्रम या मूल्यांवर संस्थेची भक्कम पायाभरणी करण्यात भाईजींचे योगदान महत्त्वाचे असल्याचेही त्यांनी नमूद केले.

बुलढाणा अर्बन ही केवळ आर्थिक संस्था न राहता विश्वासाचे प्रतीक बनली आहे. भाईजींनी संस्थेच्या माध्यमातून केवळ संघटना उभी केली नाही, तर सहकारी आणि कर्मचाऱ्यांची नवी पिढी घडविण्याचेही कार्य केले. त्यांचे अनुभव, संघर्ष आणि सामाजिक योगदान भावी पिढ्यांसाठी प्रेरणादायी असल्याचे संजय राठी यांनी सांगितले.

बुलढाणा अर्बनच्या लोकपयोगी कार्याचा गौरव

कार्यक्रमाचे अध्यक्ष डॉ. जयंत पिंपरकर यांनी बुलढाणा अर्बनच्या विविध लोकपयोगी उपक्रमांचा उल्लेख केला. पतसंस्थेच्या आर्थिक कार्यासोबतच विविध सामाजिक व लोकहिताच्या उपक्रमांमध्ये संस्थेचा सहभाग असल्याचे त्यांनी सांगितले.

तसेच तिरुपती, शिर्डी, ओंकारेश्वर, अयोध्या यांसह विविध धार्मिक स्थळी संस्थेच्या माध्यमातून भक्तनिवासाची सुविधा उपलब्ध करून देण्यात आल्याचे त्यांनी नमूद केले.

आश्रमशाळा व वृद्धाश्रमात वाढदिवस साजरा करण्याचा उपक्रम

भाईजींचा वाढदिवस समाजातील गरजू, दिव्यांग आणि ज्येष्ठ नागरिकांच्या सहवासात साजरा करण्यात आल्याने या उपक्रमाला विशेष सामाजिक महत्त्व प्राप्त झाले. वाढदिवसाच्या निमित्ताने उपस्थितांनी शुभेच्छा देत सेवाभावी उपक्रमाचे कौतुक केले.

कार्यक्रमाचे आभार प्रदर्शन शाखा व्यवस्थापक अनिल राठी यांनी केले.

कार्यक्रम यशस्वी करण्यासाठी मंगरूळपीर शाखेचे कर्मचारी भूषण भोकरे, सागर दसरकर, जयदीप जायभये, बिरजू वडते, तेजस भुजाडे, लक्ष्मण व्यवहारे, मयुर वाघ, योगेश पारीख, रोहित भुतडा, मोहम्मद मोहनावाले आणि रामचंद्र परळीकर यांनी अथक परिश्रम घेतले.

सहकारातून समाजसेवेचा आदर्श

राधेश्यामजी चांडक यांच्या अमृत महोत्सवी वाढदिवसानिमित्त झालेल्या या कार्यक्रमातून सहकार, समाजसेवा आणि सामाजिक बांधिलकीचा संदेश अधोरेखित झाला. गरजू घटकांसोबत आनंदाचे क्षण साजरे करत समाजाप्रती असलेली जबाबदारी जपण्याचा आदर्श या उपक्रमातून समोर आला.