स्वप्नील ललवाणी यांच्या स्मृतीतून विद्यार्थ्यांच्या स्वप्नांना नवी भरारी!

कुऱ्हे पानाचे येथे विद्यार्थ्यांना शैक्षणिक साहित्याचे वाटप; “मोठी स्वप्ने पाहा आणि ती पूर्ण करण्यासाठी सातत्याने प्रयत्न करा” — डॉ. जगदीश पाटील

कुऱ्हे पानाचे, ता. भुसावळ : स्व. स्वप्नील ललवाणी यांच्या स्मृती दिनाचे औचित्य साधून कुऱ्हे पानाचे येथील जिल्हा परिषद केंद्रीय प्राथमिक शाळा तसेच जिल्हा परिषद उर्दू प्राथमिक शाळेतील विद्यार्थ्यांना शैक्षणिक साहित्याचे वाटप करण्यात आले. ललवाणी फाऊंडेशन संचलित स्व. स्वप्नील स्मृती गोकुळग्राम यांच्या वतीने आयोजित या उपक्रमातून स्व. स्वप्नील ललवाणी यांच्या स्मृतीला सामाजिक व शैक्षणिक कार्याची विधायक जोड देण्यात आली.

विद्यार्थ्यांना देण्यात येणारी वही ही केवळ शैक्षणिक साहित्य नसून त्यांच्या स्वप्नांना दिलेली साथ आहे. या वहीच्या प्रत्येक पानावर विद्यार्थ्यांचे अक्षर, ज्ञान, विचार आणि भविष्यातील यशाची कहाणी लिहिली जाणार आहे. त्यामुळे विद्यार्थ्यांनी या संधीचा योग्य उपयोग करून मनापासून अभ्यास करावा, वाचनाची सवय लावावी, जिज्ञासेने प्रश्न विचारावेत आणि आयुष्यात मोठी स्वप्ने पाहून ती पूर्ण करण्यासाठी सातत्याने प्रयत्न करावेत, असे आवाहन बालभारतीच्या मराठी भाषा अभ्यास मंडळाचे सदस्य डॉ. जगदीश पाटील यांनी केले.

शिक्षणाच्या माध्यमातून स्वप्नील यांच्या स्मृतीला अभिवादन

भुसावळ येथील कोटेचा महिला महाविद्यालयाचे सेवानिवृत्त उपप्राचार्य प्रा. डॉ. दिलीप ललवाणी यांचे चिरंजीव स्व. स्वप्नील ललवाणी यांच्या स्मृती दिनानिमित्त हा उपक्रम राबविण्यात आला. स्व. स्वप्नील यांच्या स्मृतीला केवळ अभिवादन न करता त्यांच्या स्मृतीतून समाजोपयोगी आणि शैक्षणिक कार्याला चालना मिळावी, या सेवाभावी भावनेतून विद्यार्थ्यांना शैक्षणिक साहित्याचे वाटप करण्यात आले.

कार्यक्रमाच्या प्रारंभी सरस्वती माता तसेच स्व. स्वप्नील ललवाणी यांच्या प्रतिमेला पुष्पहार अर्पण करून अभिवादन करण्यात आले. मुख्याध्यापक संतोष तायडे यांनी प्रास्ताविकातून कार्यक्रम आयोजनामागील भूमिका स्पष्ट केली.

“शिक्षणाला पर्याय नाही” — प्रमोद आठवले

सेवानिवृत्त उपप्राचार्य प्रमोद आठवले यांनी विद्यार्थ्यांना मार्गदर्शन करताना जीवनात यशस्वी होण्यासाठी शिक्षणाला पर्याय नसल्याचे सांगितले. उपलब्ध प्रत्येक संधीचा विद्यार्थ्यांनी योग्य उपयोग करून घ्यावा. नियमित अभ्यास, शिस्त, वेळेचे नियोजन, वाचन आणि चांगले संस्कार यांच्या माध्यमातून व्यक्तिमत्त्वाचा सर्वांगीण विकास साधता येतो. शिक्षकांचे मार्गदर्शन स्वीकारून स्वतःच्या क्षमतांची ओळख निर्माण करावी आणि भविष्यात समाजासाठी उपयुक्त नागरिक बनण्याचा प्रयत्न करावा, असे आवाहन त्यांनी केले.

प्रमोद उंबरकर यांनी विद्यार्थ्यांनी मिळालेल्या शैक्षणिक साहित्याचा योग्य उपयोग करून जीवनात यश संपादन करावे, असे सांगितले. तर विकास चौधरी यांनी शाळेच्या गुणवत्तेचे कौतुक करत विद्यार्थ्यांच्या प्रगतीसाठी शिक्षक घेत असलेल्या परिश्रमांचे अभिनंदन केले.

विद्यार्थ्यांच्या चेहऱ्यावर उमटला आनंद

शैक्षणिक साहित्य मिळाल्यानंतर विद्यार्थ्यांच्या चेहऱ्यावर आनंद स्पष्टपणे दिसून आला. आर्थिक किंवा अन्य अडचणींमुळे शैक्षणिक साहित्याची कमतरता भासणाऱ्या विद्यार्थ्यांना अशा उपक्रमांमुळे मोठा आधार मिळतो. समाजातील सेवाभावी व्यक्ती आणि संस्थांनी शिक्षणासाठी पुढाकार घेतल्यास विद्यार्थ्यांच्या भवितव्याला निश्चितच नवी दिशा मिळू शकते, असा सकारात्मक संदेश या उपक्रमातून देण्यात आला.

मान्यवरांची उपस्थिती

यावेळी व्यासपीठावर सेवानिवृत्त उपप्राचार्य प्रमोद आठवले, जिल्हा परिषद मराठी शाळेचे शालेय व्यवस्थापन समिती अध्यक्ष गणेश शिंदे, सदस्य प्रमोद उंबरकर, सेवानिवृत्त एसटी कर्मचारी विकास चौधरी, जिल्हा परिषद उर्दू शाळेचे शाळा व्यवस्थापन समिती सदस्य युसुफ शेख आदी उपस्थित होते.

कार्यक्रमाचे सूत्रसंचालन संतोष तायडे यांनी केले, तर आभार मेघ:श्याम सपकाळे यांनी मानले.

कार्यक्रमाच्या यशस्वीतेसाठी मुख्याध्यापक संतोष तायडे, मेघ:श्याम सपकाळे, शालिनी चौधरी, अनिता धनराळे, शारदा मसाने, शबाना परवीन, मोहम्मद साहील, समीना पटेल, अमरिश शेख तसेच ललवाणी फार्मचे कर्मचारी गोलू राऊत, ईश्वर तोरे आदींनी परिश्रम घेतले.

स्मृती जपण्याचा आदर्श उपक्रम

स्व. स्वप्नील ललवाणी यांच्या स्मृती दिनानिमित्त आयोजित या उपक्रमाने “स्मृती केवळ आठवणीत न राहता समाजोपयोगी कार्यातून जिवंत राहावी” हा संदेश अधोरेखित केला. विद्यार्थ्यांच्या हातात वह्या देतानाच त्यांच्या हातात भविष्यातील स्वप्ने आणि ती पूर्ण करण्याचा आत्मविश्वास देण्याचा हा प्रयत्न ठरला.