दिवाळी खरेदीसाठी नागरिकांची झुंबड

  करोना संसर्गाच्या उद्रेकामुळे गेल्या वर्षी दिवाळीत विशेष उत्साह नव्हता. यंदा मात्र, ही कसर भरून काढण्यासाठी वाशिमकर मोठ्या उत्साहाने बाहेर पडले. बुधवारी जिल्हाभरातील बाजारपेठेत ठिकठिकाणी गर्दी दिसत होती, वाशिम शहरातील पाटणी चौकात तर खरेदीसाठी नागरिकांची झुंबड उडाली होती. दिवाळी हा रोषणाईचा सण, लखलखत्या दिव्यांनी बातावरणातल्या

अंधकाराचं साम्राज्य दूर सारण्याचा, आयुष्य तेजोमय, प्रकाशमय आणि दिव्याच्या ज्योतीसमान पवित्र करण्याचा सण म्हणजेच दीपावली. त्यामुळे लक्ष्मी पुजनाच्या एक दिवस अगोदर पूजेचे साहित्यासह इतर खरेदीसाठी बाजारपेठांमध्ये चांगलीच गर्दी दिसून येत होती. पूजेचे साहित्य, मुर्ती, रांगोळी, फुले, पणत्या, श्रीफळ, पान-सुपारी यासह मिठाई व इतर साहित्याची खरेदी नागरिकांनी मोठ्या प्रमाणात केली. दिवाळी निमित्ताने बाजारपेठा गजबजू लागल्याचा आनंद निश्चितच दुकानदारांच्या आणि ग्राहकांच्या चेहऱ्यावर दिसून येत होता.