अस्थीव्यंग दुरुस्ती शिबिराची नोंदणी सुरु“सक्षम” व “डॉ. रा.ना. चौधरी ट्रस्ट”चा संयुक्त उपक्रम • दिव्यांग बालकांसाठी मोठी संधी

अकोला | प्रतिनिधी, गजानन भाऊ हरणे

अकोला –
राष्ट्रीय स्वयंसेवक संघाच्या शताब्दी वर्षानिमित्त अकोल्यात दिव्यांग बांधवांसाठी एक भव्य आणि सेवाभावी उपक्रम राबविण्यात येत आहे. “मानव सेवा हीच माधव सेवा” या तत्त्वाने प्रेरित “सक्षम” संस्था आणि शताब्दीच्या उंबरठ्यावर पोहोचलेला “डॉ. रा.ना. चौधरी ट्रस्ट” यांच्या संयुक्त विद्यमाने अस्थीव्यंग दुरुस्ती शिबिर रविवार, ७ डिसेंबर, रोजी सकाळी ९.३० ते दुपारी १.३० यावेळेत चौधरी हॉस्पिटल, सिव्हिल लाइन्स (मधु उपरगृहासमोर) येथे आयोजित करण्यात आले आहे.

बालकांच्या व्यंग दुरुस्तीवर विशेष लक्ष

या शिबिराचे सर्वात महत्त्वाचे वैशिष्ट्य म्हणजे १८ वर्षांपर्यंतच्या सर्व मुला-मुलींची संपूर्ण तपासणी करून हात-पायातील जन्मजात तसेच नंतर निर्माण झालेल्या अस्थीव्यंगाची अचूक निदान प्रक्रिया पार पाडली जाणार आहे.

गरज वाटल्यास अत्याधुनिक शस्त्रक्रिया शास्त्रोक्त पद्धतीने करण्यात येणार आहेत.
अत्यंत गरीब आणि गरजू रुग्णांसाठी शस्त्रक्रिया पूर्णपणे विनामूल्य, तर इतरांसाठी माफक शुल्कात उपलब्ध होणार आहे.

इलिझारोव तंत्रज्ञानाचा जागतिक दर्जाचा वापर

अकोल्यातील चौधरी हॉस्पिटल हे अस्थीव्यंग दुरुस्ती क्षेत्रातील आंतरराष्ट्रीय ख्यातीचे केंद्र.
इलिझारोव तंत्रपद्धती भारतात प्रथम आणणारे डॉ. मिलींद चौधरी १९८९ पासून या क्षेत्रात सातत्याने कार्यरत आहेत.

प्रसिद्ध बी. जे. वाडिया हॉस्पिटल, मुंबई येथील मुख्य शल्यचिकित्सक डॉ. रुजूता मेहता यांच्या मार्गदर्शनाखाली ही शिबिरे ३६ वर्षांपासून घेतली जात आहेत. यावर्षीच्या शिबिराचे उद्घाटनही त्यांच्या उपस्थितीत होणार असून त्या स्वतः रुग्ण तपासणी करणार आहेत. भारतातील मोजक्या महिला ऑर्थोपेडिक सर्जन्समध्ये त्यांची अग्रगण्य गणना होते.

चार पिढ्यांची सेवा परंपरा – चौधरी हॉस्पिटल

९८ वर्षांच्या परंपरेचा मान राखत चौथ्या पिढीकडून सेवा पुढे नेणाऱ्या डॉ. इशानी मिलींद चौधरी जागतिक दर्जाचे प्रशिक्षण घेतलेल्या तज्ज्ञ आहेत.
मुंबईच्या KEM हॉस्पिटल, पुण्यातील संचेती हॉस्पिटल, अमेरिकेतील फ्लोरिडातील डॉ. ड्रॉर पेली केंद्र व जपानमधील कानाझावा विद्यापीठात त्यांनी विशेष प्रशिक्षण घेतले आहे. मागील पाच वर्षांपासून त्या बाल अस्थीव्यंग दुरुस्तीमध्ये उल्लेखनीय कार्य करत आहेत.

शिबिरानंतर सातत्यपूर्ण फॉलोअप

हे शिबिर एक दिवसापुरते मर्यादित नसून—
तपासणीनंतर योग्य रुग्णांची शस्त्रक्रियेची निश्चित तारीख, तसेच व्यंग पूर्णपणे बरे होईपर्यंत नियमित फॉलोअप करण्यात येणार आहे. शिबिराचा प्रत्येक लाभार्थी हा दीर्घकालीन आरोग्य मार्गदर्शनाचा भाग असणार आहे.

मानवसेवेची संयुक्त मोहीम

या उपक्रमासंदर्भातील माहिती गुरुवारी आयोजित पत्रकार परिषदेत सक्षमचे जिल्हाध्यक्ष निकेश गुप्ता आणि डॉ. रा.ना. चौधरी ट्रस्टचे डॉ. नानासाहेब चौधरी यांनी दिली.
दिव्यांग कल्याणासाठी सातत्याने काम करणाऱ्या सक्षम संस्थेची आणि आरोग्यसेवेतील चौधरी ट्रस्टची ही संयुक्त मोहीम समाजासाठी प्रेरणादायी ठरणार आहे.

नोंदणी अनिवार्य

शिबिराचा लाभ घेण्यासाठी  नोंदणी आवश्यक असून इच्छुकांनी खालील क्रमांकावर संपर्क साधावा :
📞 74000 09096

गरजूंसाठी हक्काची संधी

दिव्यांग बांधवांच्या आयुष्यात नवी उमेद आणि सक्षम भविष्य घडविण्याच्या उद्देशाने आयोजित या शिबिराचा जास्तीत जास्त नागरिकांनी लाभ घ्यावा, असे आवाहन आयोजक संस्थांनी केले आहे.