जिजाऊ–विवेकानंद विचारांचा जागर; ज्योतीताई ठाकरे यांच्या शब्दांतून शौर्य आणि आत्मबळाची मशाल प्रज्वलित

— जिजाऊ जयंती व स्वामी विवेकानंद जयंती उत्सव २०२६ उत्साहात साजरा

वाशीम प्रतिनिधी —

राजमाता राष्ट्रमाता माँ जिजाऊ साहेब जयंती आणि स्वामी विवेकानंद जयंती यांच्या संयुक्त निमित्ताने जिजाऊ–विवेकानंद जयंती उत्सव २०२६ मोठ्या उत्साहात साजरा करण्यात आला. या कार्यक्रमात सामाजिक कार्यकर्त्या ज्योतीताई मनोज ठाकरे यांनी राजमाता जिजाऊंच्या शौर्यगाथेसह स्वामी विवेकानंदांच्या तेजस्वी विचारांचा संगम घडवत उपस्थितांना इतिहास, राष्ट्रभक्ती आणि आत्मबळ यांची प्रेरणा दिली.

आपले विचार व्यक्त करताना ज्योतीताई ठाकरे म्हणाल्या,
“आज ज्या पुण्याला आपण विद्येचं माहेरघर आणि महाराष्ट्राच्या भरभराटीचं प्रतीक मानतो, ते पुणे कधीकाळी पूर्णपणे ओसाड होण्याच्या उंबरठ्यावर होतं. राजमाता जिजाऊ पुण्यात आल्या नसत्या, तर आजचं पुणे अस्तित्वातही नसतं.”

त्या पुढे म्हणाल्या की, आदिलशाही सरदार मुरार जगदेवने पुण्यावर चाल करून शहर जाळलं, जमिनीवर गाढवाचा नांगर फिरवला आणि लोखंडी पहार रोवून भीषण घोषणा केली— “इथे जो राहील त्याचा वंश निर्वंश होईल.” या दहशतीमुळे पुणे सुन्न झालं, वस्ती ओसाड झाली आणि लोकांनी घरदार सोडली.

“अशा भयाण परिस्थितीत लोक थरथरत असताना माँ जिजाऊ पुण्यात आल्या. लोकांनी विनवणी केली— ‘माँ साहेब, इथे राहू नका, हा शाप संपवेल!’ पण जिजाऊ डगमगल्या नाहीत,” असे सांगत ज्योतीताईंनी उपस्थितांचे लक्ष वेधले. राजमातांनी थेट ती लोखंडी पहार उपटून फेकली, त्या भूमीवर सोन्याचा नांगर फिरवून ठामपणे जाहीर केलं— ‘शत्रूची दहशत संपली आहे. ही भूमी आता शापाची नाही, तर भरभराटीची आहे!’ आणि इथूनच पुण्याच्या सुवर्णयुगाची सुरुवात झाली, असा गौरवशाली इतिहास त्यांनी उलगडला.

याचवेळी स्वामी विवेकानंद जयंतीचा उल्लेख करत ज्योतीताई ठाकरे म्हणाल्या,
“जिजाऊंनी भूमीला शापमुक्त केलं, तर स्वामी विवेकानंदांनी मनाला गुलामगिरीतून मुक्त केलं. ‘उठा, जागे व्हा आणि ध्येय प्राप्त होईपर्यंत थांबू नका’ हा विवेकानंदांचा संदेश आजच्या तरुणाईसाठी दिशादर्शक आहे. जिजाऊंचं धैर्य आणि विवेकानंदांचं आत्मबळ— हाच खरा राष्ट्रनिर्मितीचा मंत्र आहे.”

या प्रेरणादायी भाषणामुळे उपस्थितांमध्ये प्रचंड उत्साह संचारला. राजमाता जिजाऊ केवळ शिवरायांची जननी नव्हे, तर महाराष्ट्राच्या स्वाभिमानाची आणि राष्ट्रघडणीची आधारस्तंभ आहेत, तर स्वामी विवेकानंद हे नवभारताच्या आत्मविश्वासाचे शिल्पकार असल्याचा ठाम संदेश या संयुक्त जयंती उत्सवातून देण्यात आला.

कार्यक्रमाच्या शेवटी जिजाऊ–विवेकानंदांच्या विचारांची मशाल आजच्या पिढीने हातात घ्यावी, भीती, अन्याय आणि दहशतीसमोर न झुकता स्वाभिमानाने उभं राहावं, असे आवाहन ज्योतीताई ठाकरे यांनी केले.

जिजाऊ जयंती आणि स्वामी विवेकानंद जयंती उत्सव २०२६ हा इतिहास, विचार आणि राष्ट्रभक्तीचा प्रेरणादायी संगम ठरला.